Almaty mektepteri jańa oqý jylyn oıdaǵydaı qarsy alýǵa daıyn
– Almaty qalasyndaǵy 202 mekteptiń 200-i jańa 2015-2016 oqý jylyn bastap jiberýge 100 paıyz daıyn. Oqýshylar oqý quraldarymen tolyq qamtamasyz etildi ári mektepterge oqýlyqtar 100 paıyz tegin jetkizildi,– deıdi qalalyq bilim basqarmasynyń basshysy Rahat Shımasheva.
Taıaýda sel júrgen Naýryzbaı aýdanynda bolǵan Almaty qalasynyń ákimi Baýyrjan Baıbek qalyptasqan jaǵdaıǵa baılanysty aýdandaǵy zardap shekken mektepterge erekshe toqtalǵan. Oqý jyly bastalatyn kúnge deıin selden zardap shekken №187, №188, №192 mektepterdegi jóndeý jumystaryn aıaqtap, 1 qyrkúıekte bilim ordasy balalardy sabaqqa eshbir alańsyz qabyldaýy tıis ekendigin mindettegen.
Qazir úsh mektepte de jańa oqýy jylyn laıyqty qarsy alý jumystary tyńǵylyqty júrgizilip jatyr. Bizben áńgimesinde №192 mekteptiń dırektory Sáýle Ádilbekqyzy bylaı dedi:
– Selden soń mektep aýlasy balshyq pen tasqa tolǵan edi. Búgingi tańda olar tazalanyp bitti. Tamyz aıynyń 25-ne deıin qalpyna keltirý jumysyn tolyqtaı aıaqtaımyz degen senimdemiz. Erteń kelip esik ashatyn 930 oqýshyny oıdaǵydaı qabyldaýǵa ázirmiz. Onyń ústine mektebimiz jańa partalarmen, oqýlyqtarmen, sondaı-aq, kompıýterlermen qamtamasyz etildi.
Taǵy bir atap óter jaıt, «Nurly jol» baǵdarlamasy aıasynda Alataý aýdanyndaǵy №26 mektep janynan salynyp jatqan 900 oryndy qosalqy nysan men Áýezov aýdanynyń Qalqaman shaǵyn aýdanyndaǵy №157 mektep janyndaǵy qosalqy qurylys oqý jyly aıaqtalǵanǵa deıin paıdalanýǵa beriledi.
Bıylǵy oqý jyly Almatynyń mektep oqýshylary men ata-analary úshin osyndaı erekshe jańalyqtarǵa toly.
Talǵat SÚIINBAI,
«Egemen Qazaqstan».
ALMATY.